ပန်းဂေါ်ဖီစိမ်း၏ ကောင်းကျိုးအာနိသင်များ

 

ပန်းဂေါ်ဖီစိမ်း၏ ကောင်းကျိုးအာနိသင်များ


Broccoli လို့ခေါ်တဲ့ ပန်းဂေါ်ဖီစိမ်းဟာ အစိမ်းရင့်ရောင်အဆင်းရှိတဲ့ ဟင်းသီးဟင်းရွက်ဖြစ်ပြီး သူ့ရဲ့ မူလပေါက်ရောက်ရာ ဒေသကတော့ အီတလီနိုင်ငံကပဲ ဖြစ်ပါတယ်။ Broccoli ဆိုသော အမည်မှာ အီတာလျံဘာသာစကားဖြစ်တဲ့ Broccolo မှ ဆင်းသက်လာပြီး Branch အကိုင်းအခက် အတက်အလက်လို့ အဓိပ္ပါယ် ရပါတယ်။ Broccoli ခေါ် ပန်းဂေါ်ဖီစိမ်းကို ၁၇ ရာစု၊ ၁၈ ရာစုလောက်ကတည်းက စိုက်ပျိုးခဲ့ကြပါတယ်။

ပန်းဂေါ်ဖီစိမ်းဟာ ကမ္ဘာပေါ်ရှိ ပေါ်ပြူလာအဖြစ်ဆုံး အသီးရွက်များတွင် တစ်ခု အပါအ၀င်ဖြစ်ပြီး သူ့ကို အစိမ်းလိုက်သော်လည်းကောင်း ၊ ဟင်းလျာများတွင် ထည့်၍ ချက်ပြုတ်ခြင်းဖြင့်လည်းကောင်း၊ ကြော်စားခြင်းဖြင့် လည်းကောင်း အမျိုးမျိုး စားသုံးကြတာ တွေ့ရပါတယ်။ သို့သော် ပန်းဂေါ်ဖီစိမ်း၏ အာဟာရဆိုင်ရာ မူလအာနိသင်ကို မပျောက်ပျက်စေတဲ့ အကောင်းဆုံးစားသုံးနည်းကတော့ ရေနွေးဖျောကာ တို့စရာအဖြစ်စားသုံးခြင်း သို့ သုပ်စားခြင်းတို့ ဖြစ်ပါတယ်။

ပန်းဂေါ်ဖီစိမ်းကို ကြာရှည်လေ့လာစောင့်ကြည့်သောအခါ ကျန်းမာရေးတွက် အကောင်းဆုံး အစားအစာ ဖြစ်ကြောင်းတွေ့ရှိရပြီး အကျိုးအာနိသင် များပြားလှသော သံဓါတ်အမြောက်အမြား၊ ပရိုတင်း၊ ခရိုမီယမ်၊ ကယ်လစီယမ်၊ ကာဗွန်ဟိုက်ဒရိတ်၊ ဗီတာမင် အေ နှင့် စီတို့ အများအပြား ပါဝင်ကြောင်း တွေ့ရှိရပါတယ်။

ဒါ့ပြင် ပန်းဂေါ်ဖီစိမ်းတွင် ကျန်းမာရေးဆိုင်ရာ အဓိကကျသော Phytochemicals ဒြပ်ပေါင်းများနှင့် Antioxidants များ ပါဝင်နေခြင်းကြောင့် အမျိုးမျိုးသော ဖျားနာခြင်း နှင့် ရောဂါကူးစက်ပိုးဝင်ရောက်ခြင်းများကို ခုခံတိုက်ထုတ်ပေးနိုင်စွမ်းရှိကြောင်း တွေ့ရပါတယ်။

ထိုမျှမကသေးပဲ အစွမ်းထက်လှတဲ့ ပန်းဂေါ်ဖီစိမ်းကို စားသုံးခြင်းကြောင့် ရရှိစေနိုင်တဲ့ ကောင်းကျိုးအာနိသင် အများအပြားမှာ

၁။ ကင်ဆာရောဂါကို ကာကွယ်ပေးနိုင်ခြင်း၊ ကင်ဆာရောဂါ၏ ဆိုးကျိုးများကို လျော့ကျစေခြင်း။
၂။ Antioxidants များပါဝင်ခြင်းကြောင့် အိုမင်းရင့်ရော်မှုကို ကာကွယ်ပေးနိုင်ခြင်း။
၃။ အမျှင်ဓါတ်များ ပါဝင်ခြင်းကြောင့် အစာကြေလွယ်ခြင်း၊ ၀မ်းချုပ်ခြင်းမှ ကာကွယ်ခြင်း။
၎။ ခန္ဓာကိုယ်မှ uric acid ကဲ့သို့သော အဆိပ်တောက်များကို ဖယ်ရှားပေးခြင်း။
၅။ ဆီးချိုရောဂါကို ထိန်းညှိပေးခြင်း
၆။ ခန္ဓာကိုယ်၏ ခုခံကာကွယ်မှုစနစ်ကို အားကောင်းစေခြင်း။
၇။ မျက်လုံး အားကောင်းစေခြင်း၊ အတွင်းတိမ် ဖြစ်ခြင်းမှ ကာကွယ်ပေးခြင်း။
၈။ အသားရေ စိုပြေလှပစေခြင်း။
၉။ အရိုးများကို သန်မာအားကောင်းစေခြင်း၊ အရိုးပွရောဂါဖြစ်ခြင်းမှ ကာကွယ်ပေးခြင်း။
၁၀။ သံဓါတ်အများပြား ပါဝင်မှုကြောင့် သွေးအားနည်းရောဂါဖြစ်ခြင်းမှ ကာကွယ်ပေးခြင်း။
၁၁။ သန္ဓေသားတွင် မွေးရာပါကျောရိုး အမြှေးကျွံ ရောဂါ (သွပ်ချာပါဒ) ဖြစ်ခြင်းကို ကာကွယ်ပေးသောကြောင့် ကိုယ်ဝန်ဆောင်များစားသုံးရန် အထူးသင့်တော်ခြင်း။
၁၂။ ကိုလက်စရော ကျစေခြင်း၊ သွေးတိုး ကျစေခြင်း။
၁၃။ ကိုယ်အလေးချိန် လျော့ကျစေခြင်း။ တို့ ဖြစ်ပါတယ်။


ဒါကြောင့် ကျန်းမာရေးဆိုင်ရာ ကောင်းကျိုးအာနိသင်ကို ပေးစွမ်းသော ပန်းဂေါ်ဖီစိမ်းကို တစ်ပတ် နှစ်ခါလောက် စားသုံးသင့်ပါကြောင်း အကြံပြုလိုက်ရပါတယ်။



လူတိုင်း ကျန်းမာပျော်ရွှင်ပါစေ...





မြတ်ဘုန်းရည်မွန် (ဆေးဝါး တက္ကသိုလ်)

Good Health and Knowledges!

By: Myat Phome Yeemon (မြတ်ဘုန်းရည်မွန်)